Heimur Egils Orra

Skamm skamm

2010-01-27T19:54:00.002Z

Hæ og hó mamma mín skammast sín bara talsvert þegar hún kíkir hingað inn í fyrsta sinn í marga mánuði. Síðasta færsla síðan 1.nóvember? Einhvern tíma var þessari síðu nú haldið betur við.

Mamma ætlar samt ekki að segjast ætla að loka síðunni ennþá. Hún ætlar í það minnsta að passa að eiga alla gullmolana sem hafa hrunið af vörum mínum í gegnum tíðina. Þeir eru ómetanlegir.

Annars er ég hress og sprækur. Æfi fótboltann á fullu og er glaður og kátur í skólanum. Mér hefur farið mikið fram segir kennarinn, bæði í lestrinum og skriftinni. Svo finnst mömmu og pabba ég hafa verið ofsalega góður á nýja árinu og geðvonskan öll á undanhaldi. Sem er nú gott.
Ragnheiður Gróa er líka ótrúlega hrifin af bróður sínum - lyftist öll upp við að sjá hann og finnst gott að príla á honum á morgnana þegar hún fær (líka) að koma í mömmu og pabba rúm. :)

The truth hurts...

2009-11-01T23:19:00.001Z

EO: Mamma hvenær breytið þið aftur nafninu úr Íslandsbanki í Glitnir?

M: Það gerist ekki, það er ekkert verið alltaf að breyta þessu fram og tilbaka

EO: En mamma, þetta er bara svindl. Þið máttuð ekkert breyta nafninu bara þó þið hafið orðið gjaldþrota. Þið verðið bara að vera Glitnir á hausnum.

- mar er nú enginn asni!

Tjillaður

2009-10-17T22:14:00.004Z

Um síðustu helgi tóku foreldrar mínir upp á því að fara að gifta sig. Ég var hringaberi og þurfti að vera í jakkafötum. Mömmu minni fannst ég að sjálfsögðu ómótstæðilega sætur í þeim en mér fannst ég nú ekki flottur. Þessi mynd segir nú soldið það sem segja þarf :)

Annars var ég mikið að spyrja mömmu hvort hinar og þessar vinkonur hennar væru búnar að gifta sig og hvort okkur yrði boðið í þau brúðkaup. Meðal annars barst talið að Maj-Britt:

Egill Orri: Mamm, er Maj-Britt búin að gifta sig?

Mamma: Nei, ekki ennþá

Egill Orri: Förum við í brúðkaupið hennar?

Mamma: Já já allavegna ég og pabbi, ég veit ekki hvort börnum verður boðið

Egill Orri: [hneykslaður] Mamma! Ég held nú að mér verði boðið, ég er besti vinur hennar!

Hrakfallabálkur

2009-08-20T22:02:00.002Z

ég er nú alltaf sami hrakfallabálkurinn. Í þetta sinn missti ég aðeins stjórn á mér í hita leiksins í fótbolta og þrusaði berum fætinum í misfellu á pallinum í sumarbústaðnum. Í stuttu máli öskraði ég eins og stunginn grís og þegar mamma og pabbi gáðu að mér var stóra táin á mér í tætlum og það var brunað með mig í Laugarás þar sem saumuð voru lítil 8 spor. Þeink jú verí næs. Enginn fótbolti hjá mér í 3 vikur.

:(

Fögur er hlíðin

2009-06-29T22:59:00.002Z

Við fórum í sveitina um helgina. Ég fékk að gróðursetja fullt af plöntum sem verða einhvern tíma (vonandi) alvöru skógur.

Þetta er tryllitækið sem við fórum á upp á heiði (meðal annars, þetta var nú alveg bílfært). Með mér á myndinni eru Björk og Helena vinkonur mínar. Þetta var ofsalega skemmtilegt.

Ég fékk að fara með pabba upp á heiði strax á laugardagsmorgun en mamma varð eftir niðri við hús með Ragnheiði sem var að leggja sig. Eftir mat þegar komið var að því að fara aftur upp á fjall snéri ég mér að mömmu minni og sagði blákalt (og í fúlustu alvöru)

"Mamma, það er best að ég keyri, því ég rata" ....

myndir frá mótinu

2009-06-22T20:44:00.013Z

Dagurinn loksins runninn upp og ég tilbúinn í slaginn

mættur á Skagann og verið að undirbúa skrúðgönguna

Fylkisliðið komið af stað í sól & blíðu

Einbeittur á svip í leik á móti Skallagrími frá Borgarnesi

Á leiðinni inn á völlinn, ég var fyrirliði

það sást glitta í átrúnaðargoðið Eið Smára á mótinu, mamma laumaðist til að taka mynd úr fjarlægð

Snilldartaktar á móti Ægi frá Þorlákshöfn

Áhangendur #1, mamma og Ragnheiður Gróa

"sponsorarnir" - afi tók þátt og styrkti sinn mann

Ragnheiður Gróa og afi að bíða á milli leikja

Það var mikið fagnað eftir leikinn við ÍA enda skoraði ég 6 mörk

Ingó kom og skemmti á kvöldvökunni

Fylkismenn á kvöldvökunni

Stefán liðsstjóri afhendir viðurkenningu fyrir þátttökuna

Ég, Baldur og Ævar, ánægðir e. gott mót

Frábær helgi að baki og ég mættur á verðlaunaafhendinguna

Þar sem mitt lið var valið það prúðasta og fyrir það fékkst langflottasti og stærsti bikarinn :)

Skagamótið

2009-06-21T21:50:00.002Z

.... var frábært. Ég keppti 8 leiki og skemmti mér konunglega. Við unnum 3 en töpuðum 5. Það var samt allt í lagi. Ég skoraði 6 mörk í einum leik og það var nóg til að gleyma öllu um töpin. Liðið mitt vann líka stærsta og flottasta bikarinn sem var veittur, það var fyrir prúðmennsku og Fylkir var að vinna hann annað árið í röð. Frábært. Mamma mín fór nú soldið bara að gráta þegar ég fagnaði með félögunum mínum. Henni fannst þetta langbesti og mikilvægasti titillinn.

Myndir koma hérna inn á morgun.

Glaður, stoltur og þreyttur strákur sem lagðist til svefns í kvöld.

Match attax

2009-06-14T00:30:00.002Z

Lífið er fótboltamyndir.

"mamma, ég fékk Van de Saar í 100 club" (borið fram hönndredd klöbb) - Mamma verður að viðurkenna að hún áttar sig alls ekki á muninum á þessu og einhverju öðru en samgleðst stráknum sínum þegar hann ljómar af stolti yfir myndum af stjörnunum sínum. Gleðin er algjör og fölskvalaus.

Er ekki dásamlegt að vera 7 (bráðum 8) og einu áhyggjur manns í lífinu eru hvort næsti fótboltapakki muni innihalda Teves í Star Player (hvað sem það nú þýðir)? Mömmu minni finnst það og vonar að áhyggjurnar mínar verði enn um sinn jafn léttvægar.

Allur að koma til

2009-05-18T23:24:00.002Z

Ég er nú allur að koma til af brotinu og man orðið sjaldan eftir því nema þegar mamma biður mig um að gera eitthvað sem ég nenni alls ekki að gera. Á morgun fer ég til læknisins í skoðun og verð væntanlega "útskrifaður" í framhaldinu. Sem er eins gott því Flatey er næst á dagskrá og þar er nú eins gott að geta hlaupið og hamast án takmarkana.

Viðbeinsbrotinn

2009-05-10T21:00:00.002Z

Já það er þokkalega hugsað um mann. Maður er bara látinn ganga um viðbeinsbrotinn í 2 daga áður en maður er sendur til læknis. Mömmu og pabba til málsbóta þá reyndar sór ég og sárt við lagði að ég væri orðinn MIKLU betri á föstudag (slysið varð á fimmtudagskvöld) og þar sem ekkert sá á mér (hvorki marblettir né skrámur) þá tóku þau það gott og gilt.
En þau sáu svo að ég hafði nú sennilega verið að harka af mér meira en góðu hófi gegnir af hræðslu við að vera annars meinað að taka þátt í KFC-móti Þróttar sem fram fór í Laugardalnum í gær. Ég var búinn að hlakka til mótsins í tæpan mánuð og ætlaði sko ekki að missa af því. Ekki síst þegar í ljós kom að ég hafði verið færður upp í lið 1 (úr 2) og vildi sýna mig og sanna. En það þurfti ekki mikið til að sjá að ég var sárkvalinn og hlífði hægri hendinni mjög mikið. Þá þýddi ekkert múður og mér skipt út af í snarhasti og keyrður á Slysó. Myndataka leiddi svo sannleikann í ljós, viðbeinið hægra megin er brotið og ég fékk fatla til að hvíla handlegginn. Annað er víst ekki hægt að gera við svona broti en ég var "kyrrsettur" af lækninum og má ekki fara á fótboltaæfingu eða í neinn hamagang næstu 2 vikurnar.
Ég lofaði mömmu og pabba að reeeeeeeeeyna að halda það því ekki vil ég eiga á hættu að komast ekki á hið langþráða Skagamót sem fram fer eftir rúmlega mánuð.
Nú er bara að kenna Ragnheiði Gróu að segja ÁFRAM FYLKIR!!

Nýr kennari

2009-05-08T21:57:00.003Z

Ég er búinn að fá nýjan kennara sem heitir Edda Júlía. Hún er svolítið öðruvísi en flestir því að hún er bara með eina hendi. Hún fékk nefnilega krabbamein og það þurfti að taka af henni höndina. En það skiptir engu máli, hún er ekkert smá dugleg og yndislegur kennari.

Í gær vildi svo til að ég datt af hjólinu mínu og var illt í öxlinni eftir byltuna. Vegna þessa fylgdu mamma og Ragnheiður Gróa mér í skólann í morgun. Mamma vildi hitta Eddu Júlíu og útskýra hvað hafði gerst og láta vita að það mætti hringja í hana ef mér versnaði og vildi láta sækja mig.

Á leiðinni vorum við mamma að ræða þetta.

Egill Orri: Mamma, þú verður að vera heima ef Edda Júlía hringir í þig

Mamma: Hún hringir bara í gemsann og ég og pabbi komum og sækjum þig ef við erum einhvers staðar út í bæ

Egill Orri: En hún er ekki með gemsanúmerið þitt, bara heimasímann

Mamma: Ertu viss? Kristín var með gemsanúmerið mitt, hún hringdi oft í mig í gemsann.

Egill Orri: Já en Kristín er líka með tvær hendur, hún gat talað í símann OG skrifað niður númerið þitt, Edda Júlía er bara með eina hendi svo hún getur BARA talað í símann!

Af lestri og hræðslu

2009-04-17T21:32:00.002Z

Ég fékk bókina um Njálssögu í jólagjöf frá Bjarka vini mínum (myndskreytta, stytta barnaútgáfu). Þegar við vorum á leiðinni í bústaðinn um páskana var mamma að lesa bókina fyrir okkur þegar heyrðist úr aftursætinu

Egill Orri: Mamma, geturðu ekki hætt að lesa þessa bók?
Mamma: Jú jú, er hún ekki skemmtileg?
Egill Orri: Nei, ég er svo hræddur við hana (innskot; enda full af morðum og drápum)

Í dag vorum við svo að keyra heim þegar ég sagði við mömmu.

Egill Orri: Mamma! Gettu hvaða bók ég var að lesa daglegum lestri í dag?
Mamma: Ég veit það ekki
Egill Orri: Hérna er vísbending, ég á hana heima.

Mamma giskaði á fullt af bókum sem ég á en gat ekki upp á þeirri réttu

Egill Orri: Ég var að lesa Njálssögu
Mamma: Nú! Ég hélt að þér fyndist hún hræðileg, þú varst svo hræddur við hana.
Egill Orri: En mamma, þú veist að ég les ekkert svo vel, ég les bara svona aðra hverja línu svo ég las ekkert þetta hræðilega.

Já maður á sko svar við öllu!

Misskilningur

2009-04-15T22:28:00.003Z

Það var fyrsti dagurinn eftir páskafrí í dag. Ég var bæði leiður og spenntur þegar ég fór í skólann í morgun. Leiður yfir því að hún Kristín væri farin í fæðingarorlof en soldið spenntur að hún Edda Júlía væri komin til að kenna okkur.

Egill Orri; Mamma, ég sé til hvort ég get verið með í leikfiminni í dag, út af því þú manst, ég er með sárið af því að ég flæktist í þarna, þarna .... vírusnum.

Mamma; Gaddavírnum?

Egill Orri; já einmitt!

Stórslys

2009-04-14T00:19:00.002Z

Ég fékk að fara með Leó besta vini upp í bústað til ömmu hans í kvöld. Þvílíkt stuð! Bústaðurinn er í Skorradal og þar er stórt leiksvæði til að ærslast um á. Sem við og gerðum, Leó og ég og frændsystkini hans. Við hlupum um og skemmtum okkur vel. En þá gerðist það. Ég sá skrítna girðingu sem ég ætlaði rétt sem snöggvast að henda mér yfir þegar *úpps* ég sat skyndilega fastur. Þetta var sko nefnilega svona gaddavír. Ég kom því heim með buxurnar í henglum, svo ekki sé fastar að orði kveðið, og þó nokkur sár og skrámur á fótleggjunum.

En ég var þvílík hetja og grét ekkert sagði Katrín mamma hans Leós.

Þegar ég var kominn upp í rúm játaði ég þó fyrir mömmu að ég hefði grátið smá, en bara af því að ég vissi ekki hvað þetta var.

Þannig að nú er ég reynslunni og nokkrum plástrum ríkari.

Með hjartað á réttum stað

2009-04-05T11:21:00.002Z

Þegar mamma kom að sækja mig í skólaselið á föstudaginn fékk hún að heyra að maður yrði að passa sig að taka öll fötin sín með sér úr skólanum þann daginn, annars yrðu þau gefin í Rauða Krossinn.

Egill Orri: Mamma! Ég ætla að skilja eitthvað eftir af því að mig langar svo að hjálpa Rauða Krossinum.

Þó mamma hafi nú ekki verið yfir sig hrifin af þeirri hugmynd þá fannst henni vissulega hugsunin falleg. Enda er Egill Orri oftast með hjartað á réttum stað.

****************

Annars var nú eiginlega hálfgerður sorgardagur í bekknum á föstudaginn þegar kennarinn okkar hún Kristín kvaddi en hún er að fara í fæðingarorlof. Bekkurinn færði henni blóm og bangsa handa litla stráknum hennar sem fer um það bil að koma í heiminn. Kristín fór nú bara hreinlega að gráta við þetta og þá opnuðust flóðgáttirnar hjá ýmsum litlum hjörtum í bekknum svo úr varð hálfgerður grátkór. Það kemur samt góð kona í staðinn, hún Edda Júlía og svo kemur Kristín aftur í fjórða bekk.

Tímamót

2009-03-31T19:32:00.002Z

Mamma og pabbi þurftu að skreppa í Hfj. áðan að athuga með rúm fyrir Ragnheiði Gróu og ég þurfti ekki að fara með og mátti í þokkabót vera EINN heima. Pabba leist nú ekkert á að leyfa þetta en mamma benti réttilega á að ég væri langt komin að því að verða 8 ára og annað eins hefðum við foreldrar hans líklega gert á þeim aldri.
Pabbi samþykkti með (semingi þó) en fannst rétt að mamma hringdi í mig (þau voru komin út af stað út götuna) og skildi eftir símanúmerin okkar til vonar og vara.
Gott og vel, mamma gerði það

Egill Orri; Halló!
Mamma: Egill, skrifaðu niður símanúmerið mitt
Egill Orri; Til hvers?
Mamma; Svo að þú getir hringt í okkur ef eitthvað er að
Egill Orri; En get ég ekki bara hringt í afa? Getur hann ekki bara komið?
Mamma; Jú hann getur það alveg en þú átt ekki alltaf að hringja í afa. Hringdu bara í okkur.
Egill Orri; En mamma! Það er bara vitleysa, afi er miklu nær og það er ekkert sniðugt að ég sé að hringja í ykkur svo þið séuð að koma heim og komist aldrei af stað. Ha mamma!

Hate to admit it, but the kid's got a point!

Litli besserwisserinn

2009-03-11T22:52:00.004Z

Ég er óþolandi besserwisser að mati foreldra minna. Ég þræti um allt og gef sko ekki þumlung eftir þó mér sé bent á augljósar villur í málflutningi mínum.
Ég verð einhvern tíma góður lögfræðingur eða *god forbid* stjórnmálamaður.

Vanræksla á hæsta stigi

2009-03-06T23:15:00.002Z

Uss uss hvað er þetta með hana mömmu mína, elskar hún mig ekkert lengur núna þegar litla systir er komin? Allavegna er ekkert verið að uppfæra þetta blogg mitt.

Reyndar hefur mamma haft í nógu að snúast (aðallega við að taka myndir af litlu systur og uppfæra síðuna hennar) en svo lét hún líka taka úr sér botnlangann í vikunni. Þegar ég heyrði af því að mamma og litla systir væru komnar á spítala varð ég alveg forviða og sagði við pabba!

Egill Orri: Af hverju?!

Pabbi: Það var verið að taka úr mömmu botnlangann

Egill Orri: HAAA og er hún þá bara botnlaus?

En á morgun verður litla systir skírð og ég hef nú aldeilis verið duglegur að koma með hugmyndir að nafni á dömuna. Í kvöld yfir matarborðinu læddist ég að mömmu og hvíslaði í eyrað hennar

Egill Orri: Mamma! Mér var að detta eitt gott í hug
Mamma: Já, hvað er það?
Egill Orri: Unnur Rós
Mamma: Já það er fallegt, en nú er bara ekki hægt að breyta, því við erum búin að láta bakarann vita...
Egill Orri: HVAÐA BAKARA?
Mamma: Sem bakaði tertuna, hann skrifar nafnið hennar á kökuna og þess vegna er ekki hægt að breyta því núna
Egill Orri: Ó ókei! En ef við eignumst fleiri börn getum við á skírt þau Unnur Rós?

Öskudagur nálgast

2009-02-07T21:18:00.004Z

En ekki alveg eins hratt og mamma og pabbi héldu. Mamma dreif sig sko út í gær í leit að ninjabúningi sem var efstur á óskalistanum. Enda ekki seinna vænna því Öskudagur er á miðvikudaginn (hélt mamma). En svo var nú ekki alveg en búningurinn fannst amk og var prófaður í gærkvöldi. Í dag sat Egill svo fyrir á nokkrum myndum eins og sjá má. Þó nokkrar tók hann sjálfur reyndar.

Litla systir er komin í heiminn

2009-02-03T20:47:00.003Z

og heim af spítalanum. Ég er frekar spenntur yfir þessu og mætti heim úr skólanum í gær með hálfan bekkinn í eftirdragi. Það vildu nefnilega allir sjá hana. Ég er voðalega duglegur að halda á henni og kyssa hana og kjassa. Þeim athöfnum fylgja yfirleitt orðin "oooohh hún er svo sæt"

Sem er náttúrulega alveg satt :)

Hérna er ein mynd af okkur systkinunum.

Lillan er svo með sína eigin síðu á www.nino.is/laxakvisl og þar eru fullt af myndum.

Hvatning

2009-01-26T17:01:00.002Z

Í morgun kom ég upp í rúm til mömmu og knúsaði hana svolítið og vildi fá hana framúr. Hún vildi kúra aðeins lengur og bar við þreytu sökum kúlustærðarinnar.

Ég hvíslaði þá inn um naflann á mömmu "Litla mín, komdu nú út á morgun, mamma er orðin svo þreytt"

Ömmu & afadagur

2009-01-22T22:16:00.003Z

Á morgun, föstudag, er ömmu & afadagur í Ártúnsskóla. Þá eru sko amma manns og afi velkomin í skólann að kynnast því sem þar fer fram. Þiggja veitingar og gera eitthvað skemmtilegt. Ég bjó til falleg boðskort sem ég sendi báðum settunum af öfum & ömmum. Þau vöktu held ég lukku, amk virðast allir ætla að mæta og ég er frekar spenntur að sýna þeim allt sem ég er að bralla á daginn.

Annars er ég þvílíkt yndi þessa dagana. Alveg hreint ofsalega geðgóður og þægur og já bara dásamlegur í alla staði. Ég hlakka alveg ofboðslega til að fá litlu systur í heiminn og klappa og strýk bumbunni á mömmu. Ég er samt ekki alveg að fatta þetta concept með settan dag. Ég virðist ekki alveg fatta að afmælisdagurinn manns er dagurinn sem maður fæðist, óháð því hver settur dagur er. Þannig að þegar mamma sagði að það væri ekki endilega víst að litla systir kæmi 1.febrúar (sem er rækilega merktur á dagatalinu sem hinn stóri dagur) þá sagði ég "fæðist hún þá ekki á afmælisdaginn sinn?"

Æi þetta er nú pínu flókið.

Jólin 2008

2009-01-18T20:58:00.015Z

Hvernig komst barnið í bumbuna?

2009-01-15T23:35:00.003Z

Ég er mikið búinn að vera að velta þessu fyrir mér síðustu daga og vikur. Loks sá mamma sæng sína útbreidda og útskýrði það nokkurn veginn fyrir mér með hjálp bókarinnar "svona varð ég til" sem við fengum á bókasafninu.,

Bókin var ágæt með hæfilega lítilli áherslu á "the actual deed" og ég var miklu nær. Ég velti þessu þó nokkuð fyrir mér og spurði svo "og GERÐUÐ þið þetta?"

Undarlega mikið á sig lagt fyrir eina litla systur fannst mér :)

Kreppan

2009-01-13T20:23:00.002Z

Mér er eitthvað tíðrætt um kreppuna þessa dagana og hana ber oft á góma. Mamma spurði mig í kvöld hverju þetta sætti, hvort við værum að ræða þetta mikið í skólanum.

Egill Orri: "Nei nei, mér finnst bara gaman að læra um hana" - "ég er svo mikill vísindamaður, ég get leyst kreppuna"

.... svo liðu nokkrar sekúndur áður en ég sagði "nei bara djók"

Þar fór nú í verr og miður!

Mamma Mia

2009-01-11T10:59:00.002Z

Ég kom út úr herberginu mínu í gær syngjandi hástöfum þetta lag nema textinn var í mínum meðförum orðinn "Mamma Mia, þú ert best í heimi! Mæ mæ bestust bestust bestust" svo knúsaði ég mömmu mína fast og kyssti á kúluna og sagði "elska þig þarna litla" við systur mína.

Að svo búnu labbaði ég aftur inn í herbergi og hélt áfram að leika mér.

Mömmu minni finnst ég stundum ómótstæðilegur sjarmör!

Gleðilegt ár

2009-01-06T17:51:00.001Z

Hæ og hó,

Gleðilegt ár allir saman. Mamma hefur verið einstaklega löt við skriftir frá því vel fyrir jól (eins og sjá má) en nú fer hún nú bara bráðum í fæðingarorlof og þá kannski hefur hún meiri tíma :)

Hún lofar amk myndum frá jólum og áramótum hingað inn bráðlega.

Jóla - jóla jóla - jóla - jóla jóla

2008-12-14T23:01:00.002Z

Ég er með þetta lag úr Vodafone auglýsingunni á heilanum og mömmu minni finnst það ekki mjög jólalegt. Eiginlega bara ofsalega leiðinlegt.

Annars er ég sprækur og við bræður fórum að sofa í kvöld búnir að setja "þvörur" í skóna okkar fyrir vin okkar hann Þvörusleiki.

... Yndislegir!

Matti bróðir ....

2008-11-20T22:26:00.002Z

... hringdi í okkur í kvöld. Fyrst talaði ég við hann, svo pabbi og svo mamma.

Matti: Hvað ertu að gera?
Sigrún: Ég er að elda
Matti: Já, pabbi var búinn að segja mér það
Sigrún: En þú, hvað ert þú að gera?
Matti: Ég er í leik
Sigrún: Já er það, en nú er Egill í fríi á morgun í skólanum
Matti: Er það, komið þá til Akureyrar .... plíííííííís
Sigrún: Já það væri gaman, en það er nú svolítið langt í burtu
Matti: En þið takið bara flugvél
Sigrún: En ég þarf að fara til læknis
Matti: Það er læknir á Akureyri
Sigrún: Já er það?
Matti: Já - hann er ofsa góður

Maður lætur nú ekkert kveða sig í kútinn svo auðveldlega.

Góð ábending

2008-11-14T14:28:00.001Z

Eftirfarandi samtal átti sér stað á milli okkar mæðgina í fyrradag.

Egill Orri: "Mamma, er Davíð Oddsson vondur maður?"
Mamma: "Nei ástin mín, hann er ekki vondur maður. Hann er samt ekkert sérstaklega góður seðlabankastjóri"

[smá umhugsun]

Egill Orri: "En mamma! það eru allir góðir í einhverju"

Hárrétt hjá þessari elsku.

Þjóðfélagsumræðan

2008-11-13T21:37:00.002Z

Við fjölskyldan fórum á Pizza Hut um daginn. Ég mátti velja hvert við fórum. Foreldrum mínum blöskraði bæði gæði matarins sem og verðið sem var vægast sagt út í hött. 5.500 kr. fyrir pizzu og gos fyrir þrjá.

Nema hvað, móður minni hefur verið tíðrætt um þessa rányrkju og í gær þegar við keyrðum framhjá Pizza Hut varð henni að orði að hún færi nú ekki aftur þangað í bráð.

Egill Orri: "Jú! ég vil fara þangað aftur, þetta var góð pizza"

Mamma: "Nei, hún var vond og hræðilega dýr. 5.500 kr. er mjög mikið fyrir svona ruslmat"

Egill Orri: "Mamma! þú ert bara að segja þetta af því það er kreppa"

Þó maður sé bara 7 ára er maður nú enginn asni.

Nöfn á litlu systur

2008-11-06T10:09:00.002Z

Þegar mér drepleiddist í gær fékk pabbi mér það verkefni að skrifa niður 5 nöfn sem mér finnast falleg og mér fyndist að litla systir ætti að bera.

1. María

2. Rósa

3. Hrefna

4. Anna

5. Brynja

Frekar "beisic" og falleg nöfn fannst mömmu minni.

Stolt mamma

2008-11-06T10:06:00.002Z

Mamma mín var bókstaflega að springa úr stolti í gær þegar hún las umsögnina mína. Það verður nefnilega að viðurkennast að hún hefur ekkert alltaf verið sú allra besta í bekknum. Ég á stundum svolítið erfitt með að vanda mig og fylgja fyrirmælum svo dæmi séu tekin.

En í þetta sinn var ég nær eingöngu með "Ágætt" eða í 9 liðum af 11 og hinir tveir voru "Gott". Mamma var voðalega glöð að sjá þetta og í kvöld fæ ég ís í eftirmat fyrir að vera svona duglegur að bæta mig.

Þetta er Egill Orri sem talar...

2008-11-02T22:02:00.002Z

Mamma sagði mér um daginnn að nú geti litla systir greint mismunandi raddir og hljóð utan við kúluna. Þetta finnst mér stórsniðugt. Ég bera bumbuna á mömmu og tala inn um naflann á henni "Halllllóóóó - þetta er Egill Orri, stóri bróðir þinn sem talar"

Alþjóðlegi bangsadagurinn

2008-10-31T11:14:00.003Z

Hann var reyndar á mánudaginn en er, vegna vetrarfrísins, haldinn hátíðlegur í Ártúnsskóla í dag. Ég tók hundinn góða með mér og þegar mamma kom niður í morgun var ég búinn að troða honum ofan í töskuna mína, samt þannig að hausinn stóð upp úr.

Mamma tók svo til nestið mitt og kom því töskuna. Ætlaði að því búnu að loka henni almennilega með því að troða bangsa greyinu alveg ofan í töskuna.

Þá leit ég við og sagði hneykslaður "Ertu frá þér kona, hann verður að geta andað!!" og bætti svo við "Já og honum má ekki verða kalt, honum verður kalt ef ég labba í skólann því hann er með hausinn upp úr. Þið pabbi verðið að keyra mig"

Þegar mamma var lítil

2008-10-19T20:41:00.002Z

Við mamma höfum verið í góðu yfirlæti á hótelinu hjá ömmu um helgina meðan pabbi og afi skruppu í jeppaferð inn í Jökulheima. Seinnipartinn í gær fórum við yfir í litla húsið hennar ömmu til að horfa á skrípó á cartoon network eða disney stöðinni (amma er sko með svona gervihnattasjónvarp).

Egill Orri: Mamma, fannst þér gaman að horfa á skrípó þegar þú varst lítil?
Mamma: Já já en það var samt ekkert voðalega mikið skrípó til þá. Bara nokkrar teiknimyndir og þær voru yfirleitt ekki á íslensku eins og núna.
Egill Orri: Var Ísland semsagt ekki til þegar þú varst lítil?

Hvað þarf maður að vera gamall til að vera gamall?

2008-10-13T20:37:00.003Z

Egill Orri: Mamma, þegar ég eignast börn, verður þú þá gömul?
Mamma: Já, þá verð ég amman - en það er langt þangað til
Egill Orri: Hvað ertu núna gömu?
Mamma: 31 árs
Egill Orri: Þá er ekki langt þangað til þú verður gömul
Mamma: Nú? hvað er maður gamall til að vera gamall?
Egill Orri: (hugs) annað hvort 86 ára eða 100 ára eða 107 ára.

Þá vitum við það. There is hope for us yet.

Sjarmörinn ég

2008-10-07T21:11:00.002Z

Ég er búinn að vera í viðtölum og prófum hjá sálfræðingi m.a. vegna rannsóknarverkefnis sem ég er að taka þátt í auk þess sem verið er að mæla hvort ég þjáist nokkuð af vott af athyglisbresti.

Nema hvað, sálfræðingurinn hringdi í mömmu í gær og spurðist fyrir um nokkra hluti og hafði þá orð á því við mömmu hvað ég væri hrikalega mikill sjarmör. Hún sagðist hafa fengið bros frá mér sem hefði bara yljað henni niðrí tær.

Iss Piss - eins og mamma mín hafi nú ekki vitað það :)

Maður fylgist nú með ...

2008-10-02T21:28:00.004Z

Sagt við kvöldmatarborðið...

"Mamma, verður Glitnir bráðum Landsbankinn?" - (smá hugs) "En verður Landsbankinn Glitnir?"

Hvorugt hélt mamma mín.

"en það var sagt í fréttunum"

Mamma mín sagði mér að trúa fyrir alla muni ekki öllu sem sagt er í fréttunum ...

Föstudagskósíkvöld

2008-09-26T23:42:00.002Z

Mamma mín hugsaði sér gott til glóðarinnar að eiga kósíkvöld með stráknum sínum í kvöld. Við bara tvö ein heima (pabbi úti á landi að vinna). Mamma var sveitt og þreytt eftir vinnuna og stakk upp á því (í símtali fyrr í dag) að við færum í sund þegar hún kæmi heim.

Mamma kom heim um kl. 17 - þá mætti henni lítill piltur sem benti út um gluggann og sagði "mamma, ég fer ekki í sund í þessu vonda veðri, það er alveg ljóst"

Loksins... loksins

2008-09-19T10:42:00.001Z

... er hann Matti minn kominn.

Við vorum ekkert smá flottir bræður í morgun þegar mamma kom niður vorum við búnir að græja morgunmatinn sjálfir (og meira að segja búnir að brytja banana út í súrmjólkina) og það ÁN þess að rústa eldhúsinu. Svooo stórir strákar!

Svo var ég nú bara sendur í skólann og Matti fékk að vera heima hjá afa Villa. Ég var nú frekar abbó - það verður að viðurkennast.

Skagamótið

2008-09-16T09:53:00.001Z

Egill Orri: mamma, hvenær fer ég á Skagamótið?
Mamma: Næsta sumar ástin mín
Egill Orri: Verður þá litla barnið komið?
Mamma: Já þá muntu eiga litla systur
Egill Orri: Já og hún verður að vera dugleg að sitja í stúkunni og hrópa 'Áfram Fylkir'
Mamma: Það er ólíkegt, hún verður ennþá svo lítil að hún kann ekkert að tala
Egill Orri: Okey, en ef við bara erum hörð og segjum henni á hverjum degi "þú verður að segja Áfram Fylkir" þá kannski lærir hún það.

... it could happen! :)

Barnið í bumbunni hennar mömmu ...

2008-09-15T13:28:00.003Z

... er stelpa. Eða svo sagði ljósmóðirin amk við mömmu & pabba í morgun.

Spurning hvað okkur bræðrum mun finnast um það!

Réttir

2008-09-11T10:58:00.004Z

Á morgun fæ ég að fara í réttirnar með Hirti Snæ frænda mínum. Það verður nú fjör. Fór líka í fyrra og skemmti mér prýðilega. Pabbi verður líka á svæðinu en hann ætlar að ríða á móti smölunum með fólkinu frá Syðra-Langholti. Mamma verður hins vegar að vera í vinnunni og missir af öllu fjörinu (... eins og alltaf!) en ætlar að koma í Hrepphóla annað kvöld og fá sér kjötsúpu.

Hér er ég í fyrra að hjálpa til við að ná í Hrepphólaféð.

Ma'r kann nú á þessu tökin! :)

Hvað kostar þetta?

2008-09-06T18:06:00.003Z

Í dag eftir Haustmót KSÍ var farið niðrí bæ að skoða á mig íþróttaföt. Á leðinni kom til tals að ég fengi nýja gervigrasskó fyrir æfingarnar í haust(vetur). Mig langaði mest í einhverja Ronaldiniho skó sem eru víst það heitasta í dag. Mamma sagðist nú ekki vera til í að borga hvað sem er fyrir þá en vissulega væri í lagi að skoða þá.

Egill Orri: Mamma, þeir eru hundódýrir! Kosta ekki mikið.
Mamma: Ástin mín, þú ert nú ekki með besta verðskynið sko.

Egill Orri: Hvað er verðskyn?

.... I rest my case!

Áfram Fylkir

2008-08-24T21:32:00.005Z

Ég keppti á Orkuveitumótinu í dag. Í grenjandi rigningu en við létum það nú ekkert á okkur fá. Ég stóð mig rosavel, var bæði í marki og varði þrususkot og var svo úti á velli í nokkrum leikjum og lét ekkert muna um að skora glæsilegt sigurmark. Pabbi og mamma að rifna úr stolti auðvitað og vilja meina að sá sigur hafi orðið til þess að við unnum okkar deild sem við gerðum. Fengum bikar og medalíu. Ekki slæmur dagur það.

Þreyttur?

2008-08-22T18:23:00.005Z

Þreytandi þessi kvöldlestur.... :) Hérna er ég steinsofnaður með bókina á hausnum.

Höfuðborgirnar

2008-08-17T15:36:00.003Z

Í gær skruppum við bræðurnir í IKEA. Á leiðinni heim segir Egill Orri

"Mamma, þú verður að kenna mér allar höfuðborgirnar áður en ég byrja í skólanum"
"Það gæti orðið erfitt, þær eru nefnilega svo margar. Næstum því 200"
"Ok, en kenndu mér nokkrar"
"Allt í lagi, hver er höfuðborgin í Svíþjóð?"
"Stokkhólmur"
"Rétt, en í Danmörku?"
"æi hvað var það aftur... æi ..... gefðu mér vísbendingu"
"Það byrjar á Kaup........."

Þá heyrist í Marteini

"Kaupþing!!"
Hann var sko alveg með þetta :)

Ég verð stóri STÓRI bróðir

2008-08-06T12:30:00.003Z

Þessi mynd er tekinn inni í maganum á mömmu minni. Það fannst okkur bræðrum býsna merkilegt......

Fáviska?

2008-07-12T23:19:00.002Z

Um daginn voru mamma og Marteinn í bílnum að koma úr Bónus. Hann var óvenjuspurull og mamma óvenjulöt að svara.

"Sigrún! af hverju pípir ekki þessi bíll þegar maður gleymir að setja á sig beltið?
"ég veit það ekki kallinn minn"
"En af hverju heitir þetta eiginlega belti?"
"ég veit það ekki Matti minn"

smá þögn....

"En Sigrún, veistu EITTHVAÐ?"

Áfram Fylkir

2008-07-11T10:11:00.002Z

Ég er búinn að vera á leikjanámskeiði hjá Fylki þessa vikuna og hef skemmt mér vel. Kem svo heim, fer beint út að leika og sést ekki heima hjá mér fyrr en langt eftir kvöldmat. Þetta er sko lífið enda er ég orðinn súkkulaðibrúnn og sætur og þar af leiðandi extra ómótstæðilegur í augum móður minnar sem notar hvert tækifæri til að knúsa mig - nóg komið af svo góðu finnst mér nú og er farin að hlaupa undan henni og það sem meira er farin að sofa alla nóttina í mínu rúmi. Held að kellingin sé nú komin með nett fráhvarfseinkenni.

Afmælispiltur

2008-07-03T19:53:00.002Z

Er það nú glötuð mamma sem ég á sem ekki skrifar einu sinni færslu á afmælisdaginn manns. En semsagt í gær átti ég afmæli og það 7 ára! Mömmu finnst ég alveg hreint óhugnalega stór og fullorðinn og trúir því varla að hún eigi svona stóran strák.

Í tilefni dagsins komu afar mínir og ömmur í mat ásamt Halldóri, Huldu og Hirti Snæ og Tullu frænku sem verið hefur í heimsókn frá Svíþjóð. Fullorðna fólkið reif í sig dýrindis nautasteik meðan við strákarnir lékum okkur úti í garði. Við fengum svo einhverja skitna hamborgara því allt hitt var búið þegar við komum loksins inn.

En á morgun held ég afmæli fyrir krakkana í bekknum/hverfinu og svo er annað afmæli í næstu viku fyrir ættingja og aðra vini. Þess vegna held ég því óhikað fram að ég eigi afmæli tvo daga í viðbót.

Neytandi af guðs náð?

2008-06-26T09:18:00.004Z

Við vorum ekki fyrr lent í München og byrjuð að labba út í bíl þegar ég sagði við mömmu mína:

"Mamma, hvenær byrjum við að kaupa?"

Mamma: Kaupa hvað?

Egill Orri: Bara þú veist kaupa svona dót. Pabbi sagði að við myndum eyða svo miklum peningum í þessu fríi.

Að hugsa eins og hagfræðingur

2008-05-30T10:27:00.002Z

Þetta heldur hún móðir mín að hún sé loksins búin að hafa það af að kenna mér. Þegar við vorum í Flatey um síðustu helgi var ég ekki búinn að vera nema ca. 15 mínútur í eynni þegar ég var búinn að bleyta bæði skó og sokka. Mamma greip mig þar sem ég var kominn úr hvoru tveggja og hljóp um í bleytunni berfættur. Hún var nú ekki ánægð með það kellingin og dró mig inn í hús að finna á mig þurra sokka og setja mig í stígvélin.

Mamma: Egill Orri! Hvar eru sokkarnir sem þú varst í?

Egill Orri: (yppti öxlum) Ég veit það ekki!

Mamma: Egill Orri, gengurðu svona um hlutina þína. Ekki nóg með að þú sért búinn að bleyta þig allann heldur skilurðu bara eftir sokkana úti á víðavangi. Farðu út og finndu þessa sokka. Annars verð ég endanlega brjáluð.

Egill Orri: (leit út í hryssingslega veðrið, leit svo á mömmu sína og sagði) En mamma, hvað verðurðu lengi reið?

(Maður er nú enginn asni og er ekki að leggja á sig of mikla óþarfa vinnu ef hún verður kannski bara stutt reið)

Dans

2008-05-19T22:07:00.002Z

Ég fékk að vera með í ratleiknum sem mamma, Stína og Beta höfðu skipulagt um Borgarnes um helgina. Ég fékk sko að vera með pabba í liði og mér fannst þetta rosalega gaman. Um kvöldið var svo borðað á hótelinu hans afa og þar átti hvert lið að vera með skemmtiatriði. Þá fékk ég að vera með sérstakt atriði, dans, við lagið Hey hey hey I say Ho ho ho. Þessi dans var að vísu meira svona fimleikaæfingar en þetta var nú samt bara voða fínt hjá mér. Ég uppskar sérstök heiðursverðlaun fyrir vikið. Það var flottur Ferrari leikfangabíll.
Morguninn eftir var ég að leika mér með bílinn flotta...

Mamma: Þetta er aldeilis flottur bíll sem þú fékkst, ekkert smá heppinn
Egill Orri: Já en ég vissi að ég myndi fá hann
Mamma: Nú?
Egill Orri: Já, ég vissi alveg að ég var langflottastur

Sælir eru hógværir því þeir munu erfa jörðina - eða something to that effect.

Ekkert að frétta?

2008-05-13T13:11:00.003Z

No news is good news.

Við bræður erum kátir og áttum góða helgi saman. Fórum hjólandi í Hvítasunnudagsmatinn hjá ömmu og erum búnir að vera endalaust úti í skotbolta og öðrum leikjum. Nú styttist líka svakalega í Ítalíu. Við verðum með okkar eigin sundlaug og allt .... :)

Afi minn ...

2008-05-04T23:25:00.002Z

... hann á afmæli í dag. Sko hann Hjörtur afi. Við afi erum sko bestu vinir og ég næ nú oftast að vefja honum svona þokkalega í kringum litlafingur á mér. Þetta veit ég og reyni oftar en ekki að ganga á lagið. Þessu áttaði ég mig á snemma á lífsleiðinni og því til staðfestingar er hér rifjuð upp ein fleyg setning frá árinu 2004

Mamma: Egill Orri, eigum við að koma afa Hjartar?

Egill Orri: (yfir sig hrifinn) JaaaaaÁ - hann gefur mér alltaf allt sem ég vil því ég er litli strákurinn hans

Innilega til hamingju með daginn elsku Hjörtur afi

Sumargjöfin

2008-04-30T10:33:00.002Z

Við bræður fengum nýjan fótbolta og alvöru markmannshanska í sumargjöf. Voðalega ánægðir með það og ég fékk að fara með hvorttveggja í skólann á föstudaginn var.

Pabbi var búinn að segja mér að ég yrði að passa þetta vel og hann myndi alveg sturlast ef ég týndi þessu. Ég játti því.

Þegar ég var að fara út úr bílnum hjá mömmu um morguninn þá sagði mamma

"Þú manst hvað gerist ef þú týnir þessum nýja bolta og hönskunum?"

Egill Orri: Já já, þá þyrlast pabbi alveg....

Ísbúðin

2008-04-29T13:44:00.002Z

Á föstudaginn vorum við mamma á leiðinni að kaupa tvennt. Málningu og afmælisgjafir fyrir Ásrúnu og Birtu. Sólin skein og það var eitthvað svo sumarlegt og gott veður svo mamma stakk upp á því að við færum og fengjum okkur ís.

Egill Orri: Já! gerum það
Mamma: (eftir smástund) við kannski byrjum bara á því, áður en við förum í dótabúðina og málningarbúðina?!
Egill Orri: (hneykslaður) GAUR! Ég var að segja það

***honestly mom, get with the programme***

Fjör í sveitinni

2008-04-28T10:15:00.002Z

Matti bróðir fór í sveitina á sumardaginn fyrsta. Hann fór sko alla leið vestur á Gjögur til ömmu Oddnýjar. Það leiðist honum nú örugglega ekki, hefur sko engan tíma til að tala við okkur sem eftir sitjum heima. Mamma Helga hringdi í hann á föstudaginn og það var nú stutt samtal.

Matti: Mamma! Ertu ekki að verða búin að tala? Þú ert sko eiginlega að trufla mig, ég er að læra að prjóna!

Alltaf líf & fjör í sveitinni.

Stelpubrók

2008-04-28T10:00:00.002Z

Á laugardaginn þá er ég að klæða mig í fötin þegar mamma tekur eftir því að ég er að vöðla saman nærbuxunum mínum að aftan og troða þeim milli rasskinnana á mér.

Mamma: Hvað ertu að gera Egill minn?

Egill Orri: Æi mig langaði bara að prófa hvernig væri að vera í svona stelpunærbuxum (innskot: as in g-streng)

Fyndin fortíð

2008-04-23T11:45:00.002Z

Þegar mamma er svona langt í burtu frá mér þá hefur hún kannski lítið af mér að segja, svo henni datt í hug að fara að skoða gamlar færslur hérna á blogginu í gær. Þau eru nú ófá gullkornin og prakkarastrikin sem ég hef átt í gegnum tíðina. Í senn súrt og gott hvað mamma mín er með mikið gullfiskaminni. Hérna er eitt dæmi af hvoru:

skrifað 28.september 2005

En það var soldið fyndið í gær þegar við mamma vorum að fara heim og ég var að segja bless við hana Anniku sem vinnur líka á deildinni minni. Þá sagði ég 'bless og takk í dag' en mamma sem er alltaf að hvetja mig til að æfa sænskuna sagði mér að ég yrði að segja á sænsku takk í dag. Þá sagði ég 'á sænsku takk í dag'. Til hvers að vera að flækja málið?

skrifað 27. mars 2006

Í gær vorum við mamma að spila minni (e. memory). Í fyrsta sinn hafði ég sjálfur raðað öllum spjöldunum og var afar stoltur af sjálfum mér sem von var. Þegar spilið hófst fékk ég strax 5 samstæður í röð og fannst móður minni þetta nokkuð dularfullt.

Mamma: Voðalega ertu komin með margar samstæður Egill Orri - varstu nokkuð að svindla?

Egill Orri: (án allrar samvisku) Já!
**** Kjáni! Hvernig á maður annars að vinna? *****

Leikjafræði

2008-04-22T13:15:00.002Z

Á leiðinni heim úr Laxakvísl eitt kvöldið....

Egill Orri: Pabbi, getum við farið þarna í leikinn sem þú kenndir okkur þegar við komum heim?
Pabbi: Hvaða leik kallinn minn?
Egill Orri: Æi þarna með boltann.... já nú man ég, meðferðarlausan - nei ég meina aðgerðalausan.
Pabbi: Viðstöðulausan?
Egill Orri: Já einmitt - ég sagði það!

Fjörugt ímyndunarafl

2008-04-21T21:17:00.003Z

Matti: Hvenær förum við í Laxakvísl?
Sigrún: Bara núna, við erum á leiðinni þangað
Matti: Þá ætla ég að mála
Sigrún: Kanntu það?
Matti: JÁTS (hneykslaður) - ég var að kríta í leikskólanum í dag. Það var svo mikil sól á Akureyri
Sigrún: En æðislegt, og varstu bara á stuttbuxum ?
Matti: já það var sko níu sinnum heitt, á morgun verður sko 20 sinnum heitt
Sigrún: Er það? Það er nú aldeilis gott, Birna vinkona mín er nefnilega einmitt að fara til Akureyrar um helgina á skíði
Matti: Nei það er ekki hægt að fara á skíði lengur
Sigrún: Nú? Er allur snjórinn farinn?
Matti: Nei, það var snjóflóð.... það dóu margir...
Sigrún: Hvað segirðu, það er hræðilegt
Matti: Já en sumir sluppu, snjóflóðið fór afturábak OG framábak

Hann Matti bróðir minn er stundum með svo yndislega fjörugt ímyndunarafl. Já og svo gerist bara ansi margt á Akureyri sem við vitum ekki :)

Hver? Hvað? Hvor?

2008-04-14T11:35:00.002Z

Ég fór með mömmu í Mál&Menningu á Laugaveginum um helgina og fékk fótboltamyndir. Þar sem ég sat í aftursætinu á bílnum og skoðaði myndirnar með athygli spurði ég mömmu:

"Mamma! Veistu hver er besti fótboltamaður í heimi í dag?"
"Hver er það ástin mín?"
"Ronaldino"
"Ertu að meina Ronaldinhio?"
"Já"
"Eða Ronaldo?"
"Já"
"Hvorn?"
"Já"

Þá vitiði það ...

Heimanámið

2008-04-10T08:32:00.002Z

Í gær var ég að æfa mig í lestri með mömmu og þar sem ég hafði gleymt að skipta um lestrarbók í skólanum lét mamma mig lesa upp úr Kafteini Ofurbrók. Þetta er nú kannski frekar erfið bók fyrir 6 ára en ég staulaðist í gegnum þetta. Eitthvað varð ég samt pirraður á löngum og skringilegum orðunum og þar með var lestur (sem concept) bara alveg glataður.

Mamma: Egill minn, maður verður aldrei góður í neinu nema maður æfi sig.

Egill Orri: Já já ég veit alveg að æfingin skapar meistarann sko!

Nýtt og endurbætt barn

2008-04-09T15:02:00.003Z

Jemundur minn hvað hún móðir mín sannfærist hraðar með hverjum deginum að þetta 'múv' sé rétta 'múvið'.

Síðustu 3 daga hef ég:
Ekki í eitt skipti minnst á tölvuna eða að fá að fara í hana
Verið úti að leika mér í öllum veðrum
Ekkert suðað og vælt um að það sé 'ekkert að gera'
Vaaarla talað um að fá að fara til afa & ömmu (hey öllu má nú ofgera eins og þetta var orðið)

Síðustu 2 daga hef ég:
Labbað einn heim úr skólaselinu og beint 'heim' í Laxakvísl (þetta finnst mér GEÐVEIKT sport)
Klárað heimalærdóminn þegjandi og hljóðalaust
Farið að sofa og SOFNAÐ á mettíma án þess að það þurfi að halda í hendina á mér og/eða kvarta undan endalausri hræðslu við óskilgreindar ógnir alheimsins.

Litaval

2008-04-06T01:27:00.002Z

Á föstudaginn þegar mamma og pabbi voru að keyra mig í skólann fékk ég að vita það að ég mætti velja lit á einn vegg í nýja herberginu mínu.

Ég var fljótur að hugsa mig um, 'rauðan og gulan - til skiptis'

Ég er alveg viss um að það er til svona röndótt málning

Geðvonska

2008-04-02T09:39:00.002Z

Þegar ég er þreyttur, mjög þreyttur, þá verð ég úrillur, mjög úrillur. Þá hef ég beinlínis allt á hornum mér. Yfirleitt skeyti ég þá skapi mínu á móður minni (nú eða föður) sem þá gjarnan eru sökuð um allt sem úrskeiðis hefur farið í mínu stutta lífi. Þá tek ég líka einstaklega illa undir allt sem upp á er stungið.

Fyrir helgina lá ég uppi í rúmi og fékk undanþágu frá yfirvaldinu til að horfa á Latabæ fyrir svefninn (sem annars er venjulega bannað). Þegar mamma kíkti á mig um kl. 22 var ég sofnaður svo hún slökkti á sjónvarpinu mínu. Við það hrökk ég upp og sagðist ekki vera sofnaður og skipaði mömmu að kveikja strax aftur myndinni

Mamma: Nei Egill minn, nú er bara klukkan orðin svo margt og þú átt að fara að sofa

Egill Orri: Nei ég er ekkert þreyttur, ég VIL horfa á myndina

Mamma: Nei ástin mín, þú þarft að hvíla þig, það er skóli á morgun og svo förum við norður

Egill Orri: Ég ætla ekki í skólann, hann er asnalegur

Mamma: Nei nei þú veist þér finnst gaman í skólanum

Egill Orri: Nei mér finnst hann ógeð og ég vil ekki fara til Akureyrar

Mamma: Jæja ástin mín, við skulum bara ræða þetta þegar þú ert í betra skapi

Egill Orri: Nei ég ætla að vera í vondu skapi þar til ég verð gamall maður

Spennandi framtíðarsýn það

Enskukunnátta

2008-04-01T11:46:00.002Z

Á leiðinni heim frá Akureyri í gær heyrði mamma mig vera að muldra eitthvað við sjálfan mig.

Mamma: "hvað ertu að segja Egill minn"

Egill Orri: "Æji ég er bara aðeins að tala ensku"

Mamma: "kanntu það?"

Egill Orri: "Já (hneykslaður), Joshua kenndi mér hana"

Mamma: "já er það, er hann soldið góður í ensku?"

Egill Orri: "Játs, hann er ótrúlega góður, hann kann meira að segja að segja hundraðogellefu!!!"

Innskot: Hundrað er nefnilega mælikvarði á allt sem er rosalega hratt, fljótt, flott og gott. Enskukunnáttan er greinilega mæld með sömu aðferðum :)

Laxakvísl

2008-03-28T14:51:00.002Z

Jæja ég fór með mömmu og pabba að skoða nýja húsið okkar í gær (Nei Inga frænka, fjármögnunin er ekki ennþá frágengin). Það var rosalega gaman. Helga bekkjarsystir mín og vinkona býr sko á nr. 8 (sem er fjórum húsum til hægri við okkar) og við fórum strax að leika okkur. Svo búa líka fleiri krakkar úr bekknum mínum í götunni svo ekki sé minnst á frændsystkini Leós sem búa á nr. 20 og svo Leó sjálfur ekki langt undan í Árkvörninni.

Mamma mín er voðalega spennt og fegin að vera að flytja í hverfið og sér strax hvað þetta verður miklu skemmtilegra fyrir mig að hafa svona marga krakka til að leika við.

Páskabíltúr

2008-03-23T14:02:00.012Z

Á föstudaginn langa fórum við bræður í bíltúr um Borgarfjörðinn. Það var gaman og við komum víða við. Við fórum m.a. að Deildartunguhver sem amma sagði okkur að væri vatnsmesti hver í Evrópu og úr honum koma 180 lítrar af 97°C heitu vatni á hverri sekúndu!! Það fannst okkur mikið. Ennþá magnaðra fannst okkur að allt þetta heita vatn skyldi vera sett í riiiiiiiisalanga leiðslu og sent alla leið til Borgarness og Akraness til að hita þar upp húsin.

Og vitiði bara hvað? Amma Unnur tók með egg og við SUÐUM ÞAU Í HVERNUM! og svo borðuðum við þau. Þett fannst okkur sko merkilegt.
Hérna eru eggin að sjóða ...

.... og hér erum við að taka utan af þeim

... og svo borða með bestu lyst :)
Það kom reyndar fyrir að mamma missti lúffuna sína í hverinn þegar hún var að fiska upp eggin. Hún flaut hratt niður strauminn og inn í affallsrör sem þarna var og endaði þar með sína ævidaga - amk sem lúffa. Við höfðum af þessu töluverðar áhyggjur og töluðum mikið og lengi um lúffuna og tókum nærri okkur að mömmu yrði núna svo kalt á annarri hendinni. - (mömmu fannst þetta mjög skrítið í ljósi þess að okkur virðist nákvæmlega sama þegar við týnum húfum og vettlingum í tugatali) - Fundum það svo út að lúffan myndi náttúrulega koma út um hitavatnsleiðsluna í Borgarnesi og hlógum mikið að því að kannski kæmi hún upp í heita pottinum á hótelinu hans afa.

Ég er líka á lífi

2008-03-20T20:17:00.002Z

Hér sitjum við bræður á hótel ömmu og höfum það nú frekar gott. Von er á ömmu Gróu og afa Villa úr Reykjavík til að það sé nú örugglega einhver til að dekra okkur meðan afi Hjörtur og amma Unnur þurfa að vinna.
Það var nú ekki leiðinlegt hjá okkur í gær þegar enginn gestur var á langa ganginum og við gátum spilað fótbolta inni. Enn bættist í gleðina þegar Bjarki og Margrét Íris komu við á leiðinni norður og Hjörtur Snær frændi og Stebbi frændi hans voru líka. 6 krakkar á löngum gangi þar sem mátti hlaupa og ærslast að vild. Þvílík hamingja.

Hvað vilja börn?

2008-02-19T15:16:00.005Z

Svarið er einfalt: Það sem þau geta ekki fengið.

Þegar mamma mín er heima þá vil ég helst ekki sjá hana - grenja bara stöðugt um að fá að fara til afa&ömmu og finnst foreldrar mínir vægast sagt óspennandi lið. En í gær þegar mamma hringdi í mig frá Finnlandi og ég spurði þessarar venjulegu spurningar 'Hvar ert þú' þá varð ég voðalega sár. Mamma beinlínis heyrði mig skrúfa á mig aumingjasvipinn og axlirnar síga á þennan gamalkunna hátt áður en ég sagði 'Æi mamma, þú ert alltaf út í löndum, vilt aldrei vera hjá mér'. Þó mamma mín viti alveg að ég er að feika þetta og mjólka fjarveruna 'for all it's worth' þá stakk þetta nú í hjartað á henni. Það verður að segjast eins og er.

Annars höfðum við feðgarnir höfðum það nú aldeilis kósí í gærkvöldi. Lærðum og lásum og dunduðum okkur saman. Svo fékk ég að sofa í mömmu rúmi (svo pabbi væri nú ekki einn). Ég bætti um betur því ég skreið ofan í náttbuxurnar hennar mömmu minnar og neitaði að fara úr þeim. :)
Það er ekki alslæmt að mamma fari stundum til útlanda....

Hver á meira í mér... :)

2008-02-13T14:35:00.002Z

.... mamma auðvitað. Nema hvað!

Símavændi.......

2008-02-11T20:48:00.000Z

Þegar mér finnst mamma og pabbi vera leiðinleg við mig - sem gerist nánast daglega - þá laumast ég með símann inn í herbergi og hringi í hann afa minn. Hann afa Villa. Hann er alltaf til í að hlusta á barlóm í litlum drengjum og oftar en ekki gefur hann grænt ljós á að ég fái að koma í heimsókn. Eins og til dæmis í kvöld.

Ó ég átti svo bágt. Ógeðslega leiðinlegt að vera svona 'einn heima' (að hafa báða foreldra mína hjá mér telst nú ekki með ónei). Þá heyrði mamma snöktið í mér innan úr herbergi þar sem ég hafði vafið mig inn í sængina mína og grenjaði í afa mínum í símann um að mega koma til hans.

Það verður seint á mig logið að ég sé ekki sjálfbjarga.

Bloggleti

2008-01-29T21:57:00.001Z

Voðalega er mamma mín búin að vera döpur að halda úti þessari síðu upp á síðkastið. Ekki er það vegna þess að ég hafi ekki haft nóg fyrir stafni - meira bara það að mamma er löt. Eins og fyrirsögnin segir til um.

En við bræðurnir erum búnir að finna okkur upp vafasaman leik sem heitir því skemmtilega nafni 'að sparka í pung'. Mamma var nú ekki sérlega upprifin yfir þessum leik og þótti öruggast að reyna að fá okkur ofan af þessu.

Mamma: "Strákar þessi leikur er ekki sniðugur, maður getur meitt sig mikið'
Egill Orri: "Hvað getur gerst?"
Mamma: "Pungurinn getur bara sprungið og það er mjög vont" (aðeins einfaldað orðalag fyrir okkur bræður)
Egill Orri: "Og hvað gerist þá?"
Mamma: "Þá þarf að fara til læknis og jafnvel leggjast inn á spítala"
Egill Orri: .... löng umhugsunarþögn "En rassinn? Getur hann sprungið?"
Mamma: "Nei nei"
Egill Orri: "MATTI!! förum í 'sparka í rass' "

"Simmep"

2008-01-07T13:19:00.000Z

Á laugardaginn var ég með mömmu minni í Hagkaup (-kaupum?) í Skeifunni. Þetta var akkúrat um hádegisbilið og því fékkst samþykki mömmu fyrir pylsu eftir innkaupin. Pabbi fór svo með mig á Bæjarins Bestu þarna inni í búðinni og verslaði pylsurnar.

Pabbi: Egill, viltu sinnep á pylsuna þína?

Egill Orri: Já

Pabbi rétti mér pylsuna ....

Egill Orri: "ERTU KLIKKAÐUR, ég vil ekkert svona" sagði ég og benti á sinnepið

Pabbi: Þú VARST að segja að þú vildir sinnep

Egill Orri: (alveg jafn hneykslaður) "Ég er bara sex ára!! - ég VEIT EKKERT hvað þetta heitir. Ég meinti HINA sósuna (remúlaði)"

- já mér var svo sannarlega gróflega misboðið við þessa tilraun til að pína í mig sinnepi -

Gleðilegt ár

2008-01-04T22:06:00.000Z

Á þessu ári verð ég 7 ára! Þetta finnst mömmu minni í senn mjög skrítið og pínkulítið ógnvekjandi. Henni finnst ég nefnilega bara alltaf vera litli strákurinn hennar, þetta þrátt fyrir að hún geti með herkjum loftað mér og hafi litla sem enga stjórn á mér. (að henni finnst).

En ég óska öllum sem þetta lesa gæfu og hamingju á nýja árinu. Ég held þetta verði mjög skemmtilegt ár. :)

Gleðileg jól

2007-12-24T13:29:00.000Z

Æi hvað það er nú erfitt að bíða eftir þessum jólum. Agalega agalega. En þau koma víst fyrir rest.

Við bræðurnir óskum ykkur öllum gleðilegra jóla og vonum að þið hafið það ægilega gott í kvöld.

Ryksugan á fullu...

2007-12-23T22:02:00.000Z

Í morgun voru okkur bræðrunum settir afarkostir tveir

1. hjálpa til við tiltektina

2. fara út að leika okkur

Marteinn var fljótur að velja sér seinni kostinn en ég þóttist vilja hjálpa til við þrifin. Mamma sagði mér að ég mætti ryksuga herbergið okkar. Ég gekk vasklega til verks og tók samviskusamlega upp alla legokubba og smádót sem á vegi mínum varð skv. tilmælum frá móður minni.

Eftir augnablik kom ég fram í eldhús með þær upplýsingar að 'ryksjúgan' hefði næstum því étið stóran appelsínubörk.

Áfram héldu stórræðin. Næst kom ég fram og var mikið niðri fyrir. "Mamma, ég var að ná einum sokk úr ryksjúgunni og hún var bara næstum búin að éta á mér hendina!!".

.... (hristi hausinn og dró djúpt andann) "Þetta geri ég aldrei aftur".

Já greinilegt að ófétis ryksjúgan varð mér næstum að bana :)

Hó hó hó

2007-12-20T22:41:00.000Z

Á mánudaginn fóru mamma & pabbi (og reyndar amma&afi líka) í skólann minn að sjá leikþáttinn sem við vorum búin að æfa af kappi. Það hafði átt að vera á föstudaginn síðasta en þá var bara svo brjálað veður að eiginlega engin börn mættu í skólann!

Mamma tók allt upp á video en hérna fyrir neðan má sjá 'jors trúlí'

Pottaskefill gefur í skóinn

2007-12-18T10:08:00.000Z

Á laugardaginn var Hjörtur Snær frændi minn í pössun hjá okkur. Hann fékk að gista og setti þarf af leiðandi auðvitað skóinn út í glugga eins og við bræðurnir. Pottaskefill gaf okkur bræðrum svo flotta bíla í skóinn en Hirti Snæ forláta King Kong górillu. Ég kem fram með stírurnar í augunum og bið mömmu að hjálpa mér að opna górilluna mína??! Mamma varð nú hálfhissa á þessu þar sem hún þóttist vita að Hjörtur Snær hafi fengið górilluna en ekki ég. Og nú voru góð ráð dýr, hvernig átti mamma nú að snúa sig út úr þessu. Hún vissi náttúrulega ekkert hvað Pottaskefill hafði gefið... eða hvað? Hún ákvað samt að reyna að fá mig til að játa glæpinn.

Mamma: "Egill Orri, ertu viss um að þú hafir fengið King Kong í skóinn?"

Egill Orri: (án þess að blikna) "já hann var í skónum mínum"

Mamma: "Mamma heldur að hann hafi verið handa Hirti Snæ"

Egill Orri: (og nú fór samviskubitið að gera vart við sig) "neeeeei nei hann var í mínum skó"

Mamma: (tók strákinn sinn í fangið, strauk vangann og sagði) "ertu aaaalveg viss, mamma kíkti í skóinn í nótt og sá górilluna í skónum hans Hjartar. Ég held að Pottaskefill hafi viljað að þú fengir bílana af því að hann veit að þér finnst svo gaman í bíló"

*** þegar hér var komið brotnaði 'glæpamaðurinn' niður og játaði brotið greiðlega, með grátstafinn í kverkunum þó***

Egill Orri: "En mig langaði bara svo mikið að eiga apann, hann er svo flottur og ég á engan svona apa. Fyrirgefðu mamma. (brast í grát)"

Æi æi æi mömmu minni fannst þetta nú pínkusætt og ef maður er Pollýanna þá ber þetta bara vott um sjálfsbjargarviðleitni. En hún var samt voða stolt af mér að hafa skilað gripnum í réttar hendur.

Misheppnað uppeldi

2007-12-13T09:06:00.000Z

Í gær vorum við mamma að skrifa jólakortin og ég var mjög duglegur að hjálpa henni að setja frímerkin á umslögin. Mamma skrifaði svo utan á þau. Þegar hún tók umslag sem ekki var neitt frímerki komið á hrópaði ég upp yfir mig

"Sjáðu mamma, það er engin Domino's pizza á þessu umslagi!"

Móður minni fannst henni þarna alveg hafa mistekist þjóðlegt uppeldi mitt.

útstáelsi alltaf hreint á þessu fullorðna fólki

2007-12-03T22:24:00.000Z

Um daginn fékk ég að sofa hjá ömmu langömmu eins og ég kalla hana iðulega. Hún amma langamma heitir sko Sigrún alveg eins og hún mamma mín (sem er enda skírð í höfuðið á henni) og er alveg frábær kelling. Ótrúlega hress og flott kona af 77 ára að vera. Hún og afi Halldór búa á Selfossi og þar var foreldrum mínum boðið að gista. Þannig að ég ég fékk að vera hjá ömmu á meðan. Þegar líða tók að háttatíma var ég nú eitthvað lítill í mér og vildi fara að hringja í mömmu mína. En amma tók það ekki í mál

Amma langamma: veistu það Egill Orri að hún mamma þín er að skemmta sér og hún má það bara alveg. Við skulum bara leyfa henni að vera í friði"

Egill Orri: En hún er ALLTAF að skemmta sér!

Jóla jóla...

2007-12-02T21:45:00.000Z

Í gær fórum við í föndur í skólanum mínum. Við Matti fengum að skreyta piparkökur og búa til flotta jólamús. Svo fengum við líka að skreyta flott jólakerti. Mamma hafði hins vegar gerst mjög metnaðargjörn og keypt pakka af skrauti sem innihélt hvorki fleiri né færri en 12 lítil "jólabörn". Fyrr en varði var nú eiginlega bara öll fjölskyldan komin á kaf í þetta skraut og skemmti sér bara býsna vel.

Nokkrar myndir frá deginum...

Sjálfstraust

2007-11-25T11:00:00.000Z

Í morgun komu ég og Matti bróðir inn í herbergi og spurðum mömmu hvort við mættum fara í tölvuna hennar. Já var svarið sem vakti mikla lukku og ég knúsaði mömmu og sagði "þú ert besta mamma í heimi". Matti bróðir knúsaði hana líka og sagði "þú ert besta Sigrún í heimi" Mömmu minni fannst þetta sætt og sagði á móti "já og þú ert besti Marteinn í heimi".

"já ég veit það" var svarið umsvifalaust. Það er gott að vera með gott sjálfstraust :)

Halda sér við efnið

2007-11-19T19:51:00.000Z

Mamma mín sat inni í stofu og var að tala við pabba minn þegar ég stakk höfðinu út um dyragættina á eldhúsinu og sagði:

"Hey mamma! Róa sig í spjallinu og fara að tjékka á fiskinum - koma svo!"

Já það læra víst börnin sem fyrir þeim er haft!!

veðurraunir

2007-11-16T18:39:00.000Z

Í morgun var mamma mín að reyna að koma mér í stígvél og pollagalla.. af hverju? Jú það var nefnilega rigning.

Egill Orri: Mamma! Það er ekki rigning úti, þú veist það ekki

Mamma: Egill minn, þú heyrir það bara að rigningin dynur á þakinu

Egill Orri: Má ég bara gá út (opnar út og sér úrhellið) - nei þetta eru bara dropar af þakinu

Mamma: En þú sást veðurfréttirnar í gær, það átti að vera pollagallaveður í dag

Egill Orri: En mamma, þessir veðurmenn þeira vita ekki neitt. Þeir eru bara, þeir eru bara .... giskumenn!

Mickey D's

2007-11-13T14:39:00.001Z

"mamma! þegar ég verð stór ætla ég að vinna á Macdonald's"

áiiiii.....

Vetrarfrí

2007-11-02T11:51:00.001Z

Ég er búinn að vera í góðu yfirlæti hjá henni ömmu minni í vetrarfríinu. Grenjaði svoleiðis þegar ég neyddist til að fara með pabba í gær til að fara að sofa HEIMA HJÁ MÉR!! Oj bara hvað er gaman við það? Í kvöld þegar mamma mín kemur loksins heim þá förum við til ömmu langömmu á Selfossi og þaðan í bústaðinn á Laugarvatni. Jíbbí jei löng helgi í bústað. Það verður fjör á okkur bræðrum.

Foreldarviðtal

2007-10-31T13:37:00.000Z

Í morgun fóru pabbi og mamma með mig í mitt fyrsta foreldarviðtal í skólanum. Hún Kristín kennarinn minn talaði mjög fallega um mig, ekki að foreldrar mínir hafi beinlínis átt von á öðru, en það gladdi þau óumræðanlega að heyra að ég er ekki þessi "besserwisser" í skólanum sem ég er heima hjá mér. Hún Kristín kannaðist sko hreint ekki við þessa hlið á mér og fannst ég mjög prúður og góður. Stundum er ég samt svolítið fljótfær (hvaðan sem hann fær það nú !?!) og liggur mikið á að komast yfir verkefnin (svo ég geti fengið ný) mér finnst nefnilega flest þess virði að keppa um það. En á heildina voru mamma og pabbi voðalega stolt af mér og Kristín sagði að það væri engin ástæða til annars en að trúa því að ég myndi standa mig mjög vel í skólanum hér eftir sem hingað til. :)

Að sofa í sínu rúmi

2007-10-30T10:46:00.000Z

Ég var ógurlega hissa í morgun þegar ég vaknaði í mínu eigin rúmi. "Hey mamma! Ég svaf aleinn" sagði ég þegar ég vaknaði. Ofsalega hissa á þessu greinilega. Svo varð ég voða ánægður og stoltur.

"Sko mamma! ég hugsaði einmitt bara um allt sem er skemmtilegt og gaman, og nýja draugaljósð mitt (sem er næturljós í draugsformi sem var keyptur í IKEA um helgina) og hvað verður gaman að fara heim með Leó í dag og og og og....... þá var ekkert mál að sofa einn og ég var EKKERT hræddur" Mamma mín stenst mig ekki þegar ég er svona glaður og jákvæður og ég uppskar mikla kossa & knús fyrir þessa byrjun á deginum.

Í ofanálag fór ég þegjandi og hljóðalaust í úlpu, skíðabuxur OG kuldaskó! VÁ og mamma mín á ekki einu sinni afmæli!

Mömmu hlýnaði um hjartaræturnar

2007-10-25T21:10:00.000Z

"Mamma! ætlar þú ekki þarna á konufundinn?" "Má amma passa mig?"
"hvaða konufund"
"æi bara þennan þarna konufund sem var verið að tala um í útvarpinu,ég veit ekkert um hann. Ekki er ég kona!"

Mamma mín var búin að vera nákvæmlega 2 1/2 klukkustund á landinu þegar ég var farin að spyrja hvort hún ætlaði ekki út í kvöld.......... hlýlegt!

Laumulegur

2007-10-24T06:56:00.000Z

Í gær var pabbi minn að koma mér af stað í skólann og nú vissi ég að það þýddi ekkert að mótmæla regnfötunum + stígvélunum. En mér datt í hug að það væri kannski hægt að villa um fyrir pabba því hann er nú soldið svona sybbinn og utanvið sig á morgnana. Ég fór þegjandi og hljóðalaust í stígvélin og pabbi rétti mér regnkápuna. Svo sagði ég "Pabbi! Mig vantar vettlinga og húfu" (það að ég hafi verið að biðja um þessa hluti hefði auðvitað átt að kveikja á perunni hjá pabba). Meðan pabbi var að teygja sig í körfurnar með þessu dóti í uppi á efri hillu læddist ég að fatahenginu og hengdi varlega af mér regnkápuna og var að laumast í fáránlega þunna og skjóllitla vindjakkann minn þegar pabbi greip mig.

......oh næstum því!

Regnkápuraunir

2007-10-23T12:30:00.000Z

Mjér finnst alveg einstaklega leiðinlegt að vera neyddur til að fara vel klæddur í skólann. Ég á í þessu samhengi, eins og ég hef oft tjáð mig um - VERSTU MÖMMU Í HEIMI - hún vill sífellt vera að klæða mig í regnföt og stígvél. HVAÐ ER ÞAÐ! Á hverjum morgni verður pabbi minn (sem yfirleitt er þá að reyna að halda áfram að sofa inni í rúmi) vitni að sama samtalinu/rifrildinu. "Nei ég vil fara í PUMA skónum í skólann". "Nei Egill minn, það er grenjandi rigning úti" "Nei það er EKKI rigning, (máli mínu til stuðnings opna ég oftast hurðina og hleyp út og fullyrði hvort heldur sem er) - SKO, það er ENGIN rigning, ég FER í PUMA skónum, PUNKTUR. Mamma! þetta er útrætt mál"

p.s. (innskot frá mömmu) leyfði barninu að fara á flíspeysu og strigaskóm í skólann í gær. Í ljósi veðurs á ég von á að "mother of the year" medalían detti inn um lúguna bara any day now!

þétt dagskrá

2007-10-20T23:58:00.000Z

Það er nú heldur en ekki búið að dekra við okkur bræður í dag. Ekki einungis fengum við að fara í leikhús heldur á kaffihús, í sund og svo bíó líka!! Geri aðrir betur!

Leikritið sem við fórum á heitir "Gott kvöld" og er eftir Áslaugu Jónsdóttur. Það er um strák sem er einn heima meðan pabbi hans skreppur að sækja mömmu hans og meðan hann er einn verður bangsinn hans ofsalega hræddur við alls kyns kynjaverur sem fara að koma í heimsókn. Þetta eru verur eins og Hungurvofan, Tímaþjófurinn, Hræðslupúkinn, Hávaðaseggurinn, Ólátabelgurinn, Öskurapinn, Hrekkjusvínið og (uppáhaldið hennar mömmu) Fýlupokinn (sem hélt á Leiðindaskjóðunni) og Letihaugurinn. Okkur fannst þetta voðalega gaman og vorum ekkert feimnir að kalla aðeins til leikaranna ef okkur fannst þeir eitthvað ekki vera með á nótunum. Mamma mín mælir með þessu leikriti fyrir svona krakka sem stundum þora ekki að sofa í eigin rúmi t.d. af því að þeir eru svo hræddir við sjálfan sig!! :)

Besserwisser í 2 veldi

2007-10-09T22:47:00.001Z

Egill Orri: Mamma megum við fá hund?

Mamma/Pabbi: Þegar þið verðið eldri kannski

Egill Orri: Þegar ég er 7 og Matti 6?

Mamma/Pabbi: Nei meira svona kannski þegar þú ert 10 og Matti 9

Egill Orri: En þá er hann eldri en ég

Mamma/Pabbi: (Uuuuhhh) Nei nei

Egill Orri: Jú, níu er meira en tíu

Mamma/Pabbi: Nei tíu er meira en níu

Egill Orri: NEI! það er ekki satt

Mamma/Pabbi: Jú prófaðu að telja

Egill Orri: 1,2,3,4,...... (hægt) 9, 10. Nei þetta er ekki rétt, 9 ER á undan 10!

Það er rétt, aldrei að gefast upp fyrr en í fulla hnefana :) Það hlýtur einhvern tíma að koma að því að það borgi sig.

dramadrottning

2007-10-03T21:53:00.000Z

Ég er nú meiri dramadrottningin. Í kvöld fékk ég þá flugu í höfuðið að ég ætti að fá að gista hjá afa mínum. Ég fékk að hringja í hann og þegar mér var synjað um þessa bón (af móður minni NOTA BENE, afi minn stenst engin áköll frá mér) ákvað ég að skrúfa hressilega frá táraflóðinu og henti mér á baðherbergisgólfið í "ó-mig-auman" stíl par excellance.

Afi kom að sjálfsögðu hlaupandi ofan úr Hraunbæ þegar hann heyrði grátinn. Hann sagði mér langa músasögu og við það sofnaði ég.

Ég kann þetta alveg!

Stelpuafmæli

2007-09-29T19:50:00.000Z

Í dag var mér boðið í afmæli til Hafrúnar Rakelar frænku minnar. Hún var sko 5 ára. Ég var nú ekki á því að fara í svona stelpuafmæli - eitthvað prinsessudæmi.

Afmælið var samt ekki fyrr en síðdegis og við mamma slökuðum okkur fram að því. Í hádeginu kom ég út úr herberginu mínu, haldandi um magann og barmandi mér að mér væri "mjög illt í maganum".

Mamma sagði mér að fara á klósettið og sagði að það hjálpaði stundum svona magapínu. Nei ekki hélt ég það nú.

"Mamma, ég held sko að mér sé svona illt í maganum af því að þú vilt fara í þetta afmæli"